“ဂုဏ်ပြုမှတ်တမ်းလွှာ” ချီးမြှင့်ခြင်းအခမ်းအနား

နေပြည်တော် နိုဝင်ဘာ ၂၀

          နေပြည်တော်၊ ရုံးအမှတ် ၄၆၊ ပြည်တွင်းအခွန်များဦးစီးဌာန၊ အစည်းအဝေးခန်းမတွင်    ၂၀-၁၁-၂၀၁၉ ရက်နေ့ နံနက် ၁၀:၀၀ နာရီအချိန်၌ ပြည်တွင်းအခွန်များဦးစီးဌာနတွင် ကုန်သွယ် လုပ်ငန်းခွန်နှင့် အထူးကုန်စည်ခွန်ဥပဒေအရ အသုံးပြုလျက်ရှိသော အခွန်အမှတ်တံဆိပ်များကို စာရင်းရေးသွင်းရာတွင် Software Program ဖြင့် အသုံးပြုနိုင်ရန်အတွက် Inventory Management System Software Program ရေးဆွဲရာတွင် အားသွန်ခွန်စိုက် ကြိုးပမ်းဆောင်ရွက်ပေးခဲ့သော P.A.G Co.,Ltd ၏ ဒါရိုက်တာ ဦးကြည်မင်းနှင့် Software Program ရေးဆွဲပေးခဲ့သော ထိုင်ဝမ် နိုင်ငံမှ Unibex Co., Ltd တို့အား “ဂုဏ်ပြုမှတ်တမ်းလွှာ” ချီးမြှင့်ခြင်းအခမ်းအနားကို ကျင်းပ ပြုလုပ်ခဲ့ပါသည်။

          အဆိုပါ ဂုဏ်ပြုမှတ်တမ်းလွှာချီးမြှင့်ပွဲအခမ်းအနားတွင် ပြည်တွင်းအခွန်များဦးစီးဌာန၊ ဒုတိယ ညွှန်ကြားရေးမှူးချုပ် (စီမံရေးရာ) ဦးကျော်ကျော် မှ အဖွင့်အမှာစကားပြောကြားခဲ့ပြီး ဒုတိယ ညွှန်ကြားရေးမှူးချုပ် (အခွန်ကြီးကြပ်) ဦးသန်းဇော်ဝင်း၊ ဒုတိယညွှန်ကြားရေးမှူးချုပ် (ဥပဒေနှင့် မူဝါဒရေးရာ) ဦးဇေယျကြည်ညွန့်၊ ဌာနခွဲညွှန်ကြားရေးမှူးများ၊ P.A.G Co., Ltd မှ ဒါရိုက်တာ ဦးကြည်မင်း၊ ထိုင်ဝမ်ကုမ္ပဏီ Unibex Co., Ltd မှ တာဝန်ရှိသူများတက်ရောက်ခဲ့ကြကြောင်း သိရှိရပါသည်။