အလယ်အလတ်အဆင့်အရာထမ်းမွမ်းမံသင်တန်း အမှတ်စဉ် (၁/၂၀၂၃) သင်တန်းဆင်းပွဲအခမ်းအနား ကျင်းပခြင်း

နေပြည်တော် ၊ မေ  ၁၉

   စီမံကိန်းနှင့်ဘဏ္ဍာရေးဝန်ကြီးဌာန၊ ပြည်တွင်းအခွန်များဦးစီးဌာန၊ အလယ်အလတ်အဆင့် အရာထမ်းမွမ်းမံသင်တန်း အမှတ်စဉ် (၁/၂၀၂၃) သင်တန်းဆင်းပွဲအခမ်းအနားကို ၁၉-၅-၂၀၂၃ ရက်နေ့၊ မွန်းလွဲ ၁ နာရီတွင် နေပြည်တော်၊ ရုံးအမှတ် (၄၆) ရှိ ပြည်တွင်းအခွန်များဦးစီးဌာန၊ အစည်းအဝေးခန်းမ ၌ ကျင်းပရာ စီမံကိန်းနှင့်ဘဏ္ဍာရေးဝန်ကြီးဌာန၊ ဒုတိယဝန်ကြီး ဦးမောင်မောင်ဝင်း တက်ရောက် အမှာစကားပြောကြားသည်။

   အခမ်းအနားတွင် ဒုတိယဝန်ကြီးက အမှာစကားပြောကြားရာ၌ ပြည်တွင်းအခွန်များဦးစီးဌာန အနေဖြင့် အရာထမ်း၊ အမှုထမ်းများအတွက် လိုအပ်သော လုပ်ငန်းကျွမ်းကျင်မှုဆိုင်ရာ အခြေခံသင်တန်း နှင့် မွမ်းမံသင်တန်းများကို လုပ်ငန်းလိုအပ်ချက်အရ အခါအားလျော်စွာ ဖွင့်လှစ်ပို့ချ ပေးလျက်ရှိကြောင်း၊ ယခုသင်တန်းကိုလည်း အလယ်အလတ်အဆင့် အရာထမ်းများ၏ လုပ်ငန်းစွမ်းဆောင်ရည် မြင့်မားလာစေရန်နှင့် စီမံခန့်ခွဲမှုအရည်အသွေးများ ပိုမိုတိုးတက်လာစေရန် ရည်ရွယ်၍ ဖွင့်လှစ်ပို့ချပေးခဲ့ခြင်း ဖြစ်ကြောင်း၊

   ပြည်တွင်းအခွန်များဦးစီးဌာနကို ပွင့်လင်းမြင်သာမှုရှိသည့် ခေတ်မီသောအခွန်ဌာနတစ်ခု ဖြစ်လာစေရန် ရည်မှန်းချက်ထားရှိသဖြင့် အခြေခံကျသည့်ဝန်ထမ်းများ၏စွမ်းဆောင်မှု အရည်အသွေး တိုးတက်လာရေးသည် အရေးကြီးကြောင်း၊ အလယ်အလတ်အဆင့်အရာထမ်းများသည် အထက်အဆင့် နှင့် အောက်အဆင့်ကြားတွင် စီမံခန့်ခွဲမှုများ ဟန်ချက်ညီအောင် ထိန်းညှိဆောင်ရွက်ပေးရသော အရာထမ်းများဖြစ်သဖြင့် လုပ်ငန်းရည်ရွယ်ချက်များအောင်မြင်ရေးအတွက် ညှိနှိုင်းပေါင်းစပ် ဆောင်ရွက် ပေးနိုင်ရန်လိုကြောင်း။

   သင်တန်းတွင် ပို့ချပေးခဲ့သည့် ဘာသာရပ်များသည် လက်တွေ့လုပ်ငန်းနယ်ပယ်တွင် အသုံးချ ဆောင်ရွက်ရမည့် လုပ်ငန်းလမ်းညွှန်များသဖွယ်ဖြစ်၍ ယင်းတို့ကိုအသုံးချပြီး နိုင်ငံအတွက် ရသင့် ရထိုက်သည့်အခွန်ငွေများကို အလေအလွင့်မရှိစေဘဲ တတ်နိုင်သမျှ ကြိုးပမ်းကောက်ခံကြရန် ဖြစ်ကြောင်း၊ အလယ်အလတ်အဆင့်အရာထမ်းများအနေဖြင့် အခွန်ထမ်းပြည်သူများနှင့် ထိတွေ့ ဆက်ဆံရာတွင် လုပ်ငန်းပိုင်းဆိုင်ရာကျွမ်းကျင်မှု၊ ဆက်ဆံရေးပြေပြစ်မှုများမှာ မရှိမဖြစ်လိုအပ်ပြီး၊ မိမိတို့၏ဆောင်ရွက်ချက်များသည် အခွန်ယဉ်ကျေးမှုကို မြှင့်တင်ပေးနေခြင်းဖြစ်ကြောင်းကို အစဉ် အမြဲနှလုံးသွင်း၍ ဆောင်ရွက်ကြရန်ဖြစ်ကြောင်း၊ သင်တန်းသားများအနေဖြင့် အခွန်ဆိုင်ရာဥပဒေများ၊ နည်းဥပဒေများ၊ စည်းမျဉ်းများနှင့်လုပ်ထုံးလုပ်နည်းများကို သိရှိနားလည်၍ ကျွမ်းကျင်မှုရှိအောင် အစဉ်အမြဲ လေ့လာဆည်းပူးနေရန် လိုအပ်သကဲ့သို့ လုပ်ဖော်ကိုင်ဖက်ဝန်ထမ်းများကိုလည်း မျှဝေပေး ခြင်း၊ အမြင်ချင်းဖလှယ်ဆွေးနွေးခြင်းများ ပြုလုပ်ကြခြင်းဖြင့် လုပ်ငန်းစွမ်းဆောင်မှု အရည်အသွေးများ အစဉ်မြင့်မားတိုးတက်လာမည်ဖြစ်ကြောင်း စသည်ဖြင့် ပြောကြားသည်။

   အဆိုပါ သင်တန်းဆင်းပွဲအခမ်းအနားသို့ စီမံကိန်းနှင့်ဘဏ္ဍာရေးဝန်ကြီးဌာန၊ ဒုတိယဝန်ကြီး ဒေါ်သန်းသန်းလင်း၊ ဝန်ကြီးဌာနအောက်ရှိလုပ်ငန်း၊ အဖွဲ့အစည်းများ၊ ဦးစီးဌာနများမှ ဦးဆောင် ညွှန်ကြားရေးမှူးများနှင့် ညွန်ကြားရေးမှူးချုပ်များ၊ အဆင့်မြင့်အရာရှိကြီးများ၊ သင်တန်းနည်းပြများ တက်ရောက်ခဲ့ကြသည်။

   ထို့နောက် ဒုတိယဝန်ကြီး ဦးမောင်မောင်ဝင်းက သင်တန်းတွင် ပထမ၊ ဒုတိယနှင့် တတိယဆု ရရှိသူ သင်တန်းသား/ သင်တန်းသူများအား ဆုများအသီးသီးချီးမြှင့်ခဲ့ပြီး၊ သင်တန်းဆင်းအောင် လက်မှတ်များ ပေးအပ်ခဲ့သည်။

   သင်တန်းအား ရက်သတ္တပတ် (၂) ပတ်ကြာ ဖွင့်လှစ်ပို့ချခဲ့ပြီး၊ သင်တန်းသို့ ပြည်တွင်းအခွန်များ ဦးစီးဌာနမှ သင်တန်းသား/ သင်တန်းသူ လက်ထောက်ညွှန်ကြားရေးမှူး စုစုပေါင်း (၈၀) ဦးတို့ တက်ရောက်ခဲ့ကြကြောင်း သတင်းရရှိသည်။