မြန်မာနိုင်ငံအတွင်းရှိ ဂျပန်ကုမ္ပဏီတစ်ခုတွင် လာရောက်အလုပ်လုပ်ကိုင်နေသော ဂျပန်နိုင်ငံသား (ပြည်ပနေနိုင်ငံခြားသား) အတွက် လစာဝင်ငွေခွန်တွက်ချက်ရာတွင် မြန်မာနိုင်ငံအတွင်းသို့ လာရောက်အလုပ်လုပ်ကိုင်သည့် ကာလအတွက် ရရှိသော မြန်မာနိုင်ငံအတွင်းရှိ ဂျပန်ကုမ္ပဏီမှပေးသော လစာနှင့် ပြည်ပရှိဂျပန်ကုမ္ပဏီမှပေးသော လစာဝင်ငွေနှစ်ရပ်ပေါင်းအပေါ်တွင် လစာဝင်ငွေခွန်တွက်ချက်ရမည် ဖြစ်ပါသည်။

မြန်မာနိုင်ငံနှင့် DTA စာချုပ်ဝင်နိုင်ငံတစ်ခုခုမှ အခွန်ထမ်းဖြစ်ပါက DTA စာချုပ်ပါအတိုင်း ခံစားခွင့်ရရှိရန် လျှောက်ထားသည့်အခါ အောက်ပါအချက်များကို တင်ပြရပါမည်-

(က)      လျှောက်ထားလိုသူပုဂ္ဂိုလ်က ဆောင်ရွက်ခဲ့သည့်လုပ်ငန်းနှင့် ပတ်သက်သော ရှင်းလင်းဖော်ပြချက်နှင့် လျှောက်ထားလိုသူက မည်သည့် DTA Article အရ DTA အခွင့်အရေးခံစားလိုပါကြောင်း ကိုယ်တိုင်ရေးလျှောက်လွှာ

(ခ)       ကိုယ်စားလှယ်ဖြစ်ပါက လျှောက်ထားခွင့်ရှိသူ၏ တရားဝင်ကိုယ်စားလှယ်လွှဲစာ

(ဂ)       လျှောက်ထားလိုသည့်ပုဂ္ဂိုလ်သည် မည်သည့်နိုင်ငံ၏ အခွန်ထမ်းဖြစ်ကြောင်း သက်ဆိုင်ရာ နိုင်ငံအခွန်ဌာန၏ ထောက်ခံချက်

(ဃ)      ချုပ်ဆိုထားသည့်စာချုပ်

အခွန်ထမ်းသည် အထက်ပါအထောက်အထားများနှင့်အတူ သက်ဆိုင်ရာအခွန်ဦးစီးဌာနမှူးရုံးသို့ တင်ပြလျှောက်ထားရမည်။

ပထမအကြိမ် ပစ္စည်းဝယ်ယူစဉ်က ငွေပေးချေချိန်တွင် ကျပ် (၁၀) သိန်း မပြည့်သေး၍ Withholding Tax နှုတ်ယူပေးသွင်းခြင်း မပြုရသေးသော်လည်း ဒုတိယအကြိမ် ငွေပေးချေသည့်အခါ ပထမ+ဒုတိယ နှစ်ရပ်ပေါင်း မှာ (၁၀) သိန်းကျော်လွန်သဖြင့် ထိုပေးချေငွေမှ စတင်၍ Withholding Tax ၂% နှုတ်ယူ ပေးသွင်းရမည်ဖြစ်ပါသည်။

အစိုးရဝန်ထမ်း (အရာရှိ) အငြိမ်းစားတစ်ဦးသည် Car Show Room မှ မော်တော်ယာဉ်ဝယ်ယူရာတွင် တာဝန်ထမ်းဆောင်စဉ်ကရရှိခဲ့သော  လစာ၊လုပ်သက်ဆုကြေးနှင့် ပင်စင်လစာတို့ကို ဝင်ငွေရလမ်းအဖြစ် တင်ပြနိုင်ပါသည်။

နယ်စပ်တွင်ဖမ်းဆီးရမိသော ကျောက်စိမ်းတုံးများကို နေပြည်တော်သို့သယ်ယူရာတွင် ကုန်ကားများကိုငှားရမ်း၍ သယ်ယူခဲ့ခြင်းအတွက် ကားငှားခပေးချေခြင်းအပေါ် စီမံကိန်းနှင့် ဘဏ္ဍာရေးဝန်ကြီးဌာန၏ အမိန့်ကြော်ငြာစာ အမှတ် ၄၇/၂၀၁၈ အရ နှစ်တစ်နှစ်အတွင်း စုစုပေါင်းပေးချေငွေ ကျပ်သိန်း ၁၀အထိ အခွန်နုတ်ယူပေးသွင်းခြင်းမပြုရပါ။ စုစုပေါင်းပေးချေငွေသည် ကျပ်သိန်း ၁၀ ထက်ကျော်လွန်ပါက Withholding Tax ၂% နုတ်ယူပေးသွင်းရပါမည်။

ကုမ္ပဏီတစ်ခုတွင် အစုရှယ်ယာထည့်ဝင်ထားသူတစ်ဦးမှာ မိမိထည့်ဝင်ထားသော အစုရှယ်ယာအတွက် ဝင်ငွေရလမ်းတင်ပြရာတွင် အိမ်ထောင်စုစာရင်း၌ အတူရှိသည့် အိမ်ထောင်ဖက်၏ လစာဝင်ငွေခွန်ပေးဆောင်ပြီးသော ဝင်ငွေအား ဝင်ငွေရလမ်းအဖြစ် တင်ပြ၍ရပါသည်။ ထိုသို့တင်ပြရာတွင် အောက်ပါတို့ကို ပူးတွဲတင်ပြရမည် ဖြစ်ပါသည်-

             (၁)       လစာဝင်ငွေခွန်ပေးဆောင်ထားသော အခွန်ပေးဆောင်မှုမှတ်တမ်းစာအုပ် မူရင်း/ မိတ္တူ

             (၂)        အိမ်ထောင်စုစာရင်း မူရင်း/ မိတ္တူ

             (၃)       အစုရှယ်ယာထည့်ဝင်ငွေနှင့်ပတ်သက်သည့် အထောက်အထားများ

ဘဏ်ချေးငွေရယူ၍ အရစ်ကျငွေချေစနစ်ဖြင့် Car Showroom မှ ဝယ်ထားသည့် ကားအခွန်ပေးဆောင်ရန်အတွက် အောက်ပါအထောက်အထားများတင်ပြရပါမည်-

             (က)    တင်ပြလိုသော ဝင်ငွေရလမ်းအ​ထောက်အထားမူရင်း

             (ခ)     ID Form (Import Declaration) မိတ္တူ

             (ဂ)     Sale Invoice

             (ဃ)    ဝယ်ယူခွင့်ပါမစ်

             (င)     အရောင်းအဝယ်စာချုပ်မိတ္တူ

             (စ)     နိုင်ငံသားစိစစ်ရေးကဒ်ပြားမိတ္တူ

             (ဆ)    အိမ်ထောင်စုစာရင်းမိတ္တူ

             (ဇ)     ကိုယ်စားဆောင်ရွက်သူဖြစ်ပါက တံဆိပ်ခေါင်းခွန်အပြည့်အဝ ကပ်နှိပ်ထားသော ကိုယ်စားလှယ်လွှဲစာ။

မော်တော်ယာဉ်ဝယ်ယူရာတွင် ဝန်ထမ်း၏ လစာဝင်ငွေအား ဝင်ငွေရလမ်းအဖြစ် တင်ပြနိုင်ပါသည်။ နှစ်တစ်နှစ်အတွင်း ဝင်ငွေကျပ် ၄၈ သိန်းမကျော်သဖြင့် ၂၀၁၇ ခုနှစ်၊ ၂၀၁၈ ခုနှစ်၊ ၂၀၁၈-၂၀၁၉ ခုနှစ် ပြည်ထောင်စု၏အခွန်အကောက်ဥပဒေများပါ ပုဒ်မ ၁၉၊ ပုဒ်မခွဲ (က) အရ ဝင်ငွေခွန်စည်းကြပ်ခြင်းမပြုသဖြင့် ကင်းလွတ်ခွင့်ရရှိသည့် လစာဝင်ငွေဆိုင်ရာ သက်သေခံအထောက်အထားများကို တင်ပြရမည်ဖြစ်ပါသည်။ 

စီမံကိန်းနှင့်ဘဏ္ဍာရေးဝန်ကြီးဌာန၏ အမိန့်ကြော်ငြာစာအမှတ် ၄၇/၂၀၁၈ အပိုဒ် ၅ အရ နှစ်တစ်နှစ်အတွင်း စုစုပေါင်းပေးချေငွေကျပ်သိန်း ၁၀ အထိ အခွန်နုတ်ယူပေးသွင်းခြင်းမပြုရ။ စုစုပေါင်းပေးချေငွေသည် ကျပ်သိန်း ၁၀ ထက်ကျော်လွန်ပါက Withholding Tax ၂% နုတ်ယူပေးသွင်းရမည်ဖြစ်ပါသည်။

ပြည်ပနေနိုင်ငံသား၏ ပြည်ပတွင်ရရှိသည့် လစာဝင်ငွေသည် ဝင်ငွေခွန်ကင်းလွတ်ခွင့်ပြု ထားသောဝင်ငွေဖြစ်ပါသည်။ ထိုဝင်ငွေအား ဝင်ငွေရလမ်းအဖြစ် တင်ပြလိုပါက အောက်ပါ အထောက်အထားများနှင့်အတူ တင်ပြရပါမည်-

(က)      ဆိုင်ရာကုမ္ပဏီက တရားဝင်ထုတ်ပေးသည့် လစာထုတ်ပေးမှုမှတ်တမ်း၊ ငွေလွှဲပို့မှု မှတ်တမ်း၊

(ခ)     ပြည်ပသို့ တရားဝင်ထွက်ခွာ၍ သွားရောက်ခြင်း၊ ပြန်လည်ဝင်ရောက်ခြင်းကို နိုင်ငံကူးလက်မှတ်ဖြင့်စိစစ်ခြင်း၊ သက်ဆိုင်ရာနိုင်ငံ၏လုပ်ငန်းမှ တရားဝင်လစာဝင်ငွေထုတ်ပေးခြင်းနှင့် လုပ်ငန်းသဘောတူစာချုပ်ဆိုင်ရာမှတ်တမ်းများ၊