ဝန်ဆောင်မှုဆောင်ရွက်သည့်  Media  ( လူထုဆက်သွယ်ရေး ) လုပ်ငန်းလုပ်ကိုင်သည့် ကုမ္ပဏီအနေဖြင့် စီမံကိန်းနှင့်ဘဏ္ဍာရေးဝန်ကြီးဌာန အမိန့်ကြော်ငြာစာအမှတ် ၁၈/၂၀၁၆ အရ ပြည်တွင်း၌ ဝယ်ယူသော ကုန်စည်များအတွက် ကုန်စည်တန်ဖိုးနှင့်အတူ ပေးဆောင်ခဲ့ရသော ကုန်သွယ်လုပ်ငန်းခွန်နှင့် ဝန်ဆောင်မှုလုပ်ငန်း ရယူခဲ့ရာ၌ ဝန်ဆောင်မှု ရငွေနှင့်အတူ ပေးဆောင်ခဲ့ရသော ကုန်သွယ်လုပ်ငန်းခွန်တို့ကို Media လုပ်ငန်းဆောင်ရွက် သည့် ဝန်ဆောင်မှုအပေါ် ကျသင့်သည့် ကုန်သွယ်လုပ်ငန်းခွန်၌ ခုနှိမ်ပေးသွင်းနိုင်ပါသည်။ ခုနှိမ်ခွင့်ရရှိရန် ဝန်ဆောင်မှုဆောင်ရွက်သူအား မှတ်ပုံတင်ခွင့်ပြုကြောင်း ထုတ်ပေးသည့် လက်မှတ်ပုံစံ ပတခ (ကသခ)-၂ နှင့် ကုန်သွယ်လုပ်ငန်းခွန်စည်းမျဉ်း ၄၂ အရ ခုနှိမ်ခွင့်ရရန် ပြည်တွင်း၌ဝန်ဆောင်မှုဆောင်ရွက်ခြင်း သက်သေခံလက်မှတ် ပုံစံ ပတခ (ကသခ)- ၃၁ နှင့် ဝန်ဆောင်မှုဆောင်ရွက်စဉ် ဝန်ဆောင်မှုအပေါ် ကုန်သွယ်လုပ်ငန်းခွန် ပေးဆောင်ခဲ့မှုနှင့် ခုနှိမ်မှုစာရင်း ပုံစံ ပတခ ( ကသခ )-၃၃ တို့ကို သုံးစောင်ပြုစုရေးသား၍ မူရင်းကို  ဝယ်သူသို့ ပေးအပ်ရန်ဖြစ်ပြီး၊ မူရင်းခွဲကို ဝယ်သူနှင့်သက်ဆိုင်သည့် မြို့နယ်အခွန်ဦးစီး ဌာနမှူးထံသို့ ပေးပို့ရန်ဖြစ်ပြီး လက်ခံအား ကုမ္ပဏီက သိမ်းဆည်းထားရန်ဖြစ်ပါသည်။

ဂဝံလမ်းခင်းကျောက်များကို အိန္ဒိယနိုင်ငံသို့ တင်ပို့ရောင်းချခြင်းအပေါ် ၂၀၁၆ ခုနှစ် ပြည်ထောင်စု၏အခွန်အကောက်ဥပဒေပုဒ်မ ၁၇ ( ခ ) အရ ရောင်းရငွေအပေါ်တွင် သုည ရာခိုင်နှုန်းဖြင့် ကုန်သွယ် လုပ်ငန်းခွန်ကျသင့်မည်ဖြစ်ပါသည်။

ငါးကိုအကင်ပြုလုပ်စားသောက်သည့် ငါးအသားလုံး၊ ငါးအသားချောင်းများကို ပြည်ပမှ တင်သွင်း ခြင်းသည် ၂၀၁၆ ခုနှစ် ပြည်ထောင်စု၏ အခွန်အကောက် ဥပဒေပုဒ်မ ၁၄ ပုဒ်မခွဲ (က) အရ ကုန်သွယ်လုပ်ငန်းခွန် မကျသင့်သည့် ကုန်စည်များ အမှတ်စဉ် (၄၁) ပါ ငါး၊ ပုစွန် စသည့်ရေထွက် ပစ္စည်းများကို အခြေခံထုတ်လုပ်သည့် တန်ဖိုးမြှင့်ထုတ်ကုန်များတွင် အကျုံးဝင်သဖြင့် ကုန်သွယ်လုပ်ငန်းခွန်မကျသင့်ပါ။

ကြွေပြားများကို ပြည်ပမှတင်သွင်းပါက တင်သွင်းစဉ် ကုန်းပေါ်ရောက်တန်ဖိုးအပေါ် ကုန်သွယ်လုပ်ငန်းခွန် ၅ % နှင့် ဝင်ငွေခွန် ၂ % အား ကြိုတင်ခွန်များအဖြစ် ပေးသွင်း ထားရမည်ဖြစ်ပြီး ပြန်လည်ရောင်းချပါက ၂၀၁၈ ခုနှစ် ပြည်ထောင်စု၏အခွန် အကောက်ဥပဒေ ပုဒ်မ ၁၄(ခ)အရ ကုန်သွယ်လုပ်ငန်းခွန် ၅ % ကျသင့်မည်ဖြစ်ပါ သည်။ ကြွေပြားများရောင်းချခြင်းအပေါ် ကျသင့်ကုန်သွယ်လုပ်ငန်းခွန်မှ ပြည်ပမှ တင်သွင်းစဉ် ပေးဆောင်ခဲ့ရသော ကုန်သွယ်လုပ်ငန်းခွန်အား ခုနှိမ်ခွင့်ရရှိနိုင်ရန် အတွက် ကုန်သွယ်လုပ်ငန်းခွန် စည်းမျဉ်း ၄၂ အရ ခုနှိမ်နိုင်ရန် လုပ်ငန်းရှင်မှတ်ပုံတင် အမှတ် ပတခ (ကသခ)-၂ ပြည်ပမှတင်သွင်းစဉ် ကုန်သွယ်လုပ်ငန်းခွန် ပေးဆောင်ပြီး ကြောင်း သက်သေခံလက်မှတ်ပုံစံ ပတခ(ကသခ)-၃၂၊ ကုန်စည်အပေါ် ကုန်သွယ်လုပ် ငန်းခွန် ပေးဆောင်ခဲ့မှုနှင့် ခုနှိမ်မှုပုံစံ ပတခ(ကသခ)-၃၃ တို့ကို ၂ စောင်စီ ပြုစု၍ သက်ဆိုင်ရာ ကုမ္ပဏီအခွန်ရုံးသို့ တင်ပြ၍ ခုနှိမ်ပေးသွင်းခြင်းကို ဆောင်ရွက်နိုင်ပါ သည်။ ဝင်ငွေခွန်မှာ ၂၀၁၈ ခုနှစ် ပြည်ထောင်စု၏အခွန်အကောက်ဥပဒေပုဒ်မ ၂၃(က) (၁) အရ ဝင်ငွေခွန်ဥပဒေပုဒ်မ ၆ အရ သက်သာခွင့်များမနုတ်မီ ယင်းကုမ္ပဏီက ရရှိသည့်ကျပ်ငွေဖြင့် စုစုပေါင်းအသားတင်အမြတ် ဝင်ငွေအပေါ် ၂၅ % ကျသင့်မည်ဖြစ်ပါသည်။

ပြည်တွင်းရှိ ကုမ္ပဏီတစ်ခုက ၎င်း၏ကုန်အမှတ်တံဆိပ်ကို ထိုင်းနိုင်ငံရှိ ကုမ္ပဏီတစ်ခု သို့ အသုံးချခွင့်ပြုသည့်အတွက် ထိုင်းကုမ္ပဏီမှရရှိသည့် ဝင်ငွေအပေါ်တွင် ကုန်သွယ် လုပ်ငန်းခွန်မကျသင့်ပါ။

အလှကုန်ပစ္စည်းအမျိုးမျိုးကိုပြည်တွင်း၌ Online မှတစ်ဆင့် ရောင်းချ၍ ရောင်းရငွေ အပေါ် ၂၀၁၆ ခုနှစ် ပြည်ထောင်စု၏အခွန်အကောက်ဥပဒေပုဒ်မ ၁၄ (ဂ) အရ ၅ % ကုန်သွယ် လုပ်ငန်းခွန် ပေးဆောင်ရမည်ဖြစ်ပါသည်။

ပြည်တွင်းရှိ ကုမ္ပဏီများ၊ Travel & Tour ကုမ္ပဏီများမှ ကုန်သွယ်လုပ်ငန်းခွန် လုပ်ငန်းရှင် မှတ်ပုံတင်လက်မှတ် ပုံစံ ပတခ (ကသခ)-၂ ရှိသည့် လုပ်ငန်းရှင်များဖြစ် သည့်အတွက် စည်းမျဉ်း ၄၂ နှင့်အညီ ကုန်သွယ်လုပ်ငန်းခွန် ခုနှိမ်နိုင်ရန်အတွက် ဝန်ဆောင်မှုဆောင်ရွက်သည့် စားသောက်ဆိုင်များနှင့် ဟိုတယ်များထံမှ ကုန်သွယ်လုပ် ငန်းခွန် ပေးဆောင်ထားသည့် သက်သေခံအထောက်အထားပုံစံ ပတခ(ကသခ)-၃၁ ကို ခုနှိမ်ခွင့် ဆောင်ရွက်ချိန်တွင် အထောက်အထားအဖြစ် တင်ပြနိုင်ရန်အတွက် တောင်းခံ ၍ ရရှိနိုင်ပါသည်။

ပြည်တွင်းကုမ္ပဏီတစ်ခုမှ ထုတ်လုပ်မှုလုပ်ငန်း လုပ်ကိုင်ရန် ငှားရမ်းခြင်းအတွက် ကုန်သွယ်လုပ်ငန်းခွန် ၅ %  ပေးသွင်းထားသော်လည်း ၎င်း နှစ်ရှည်ငှားရမ်းခြင်းအတွက် မြေနေရာအား ကုမ္ပဏီ၏ မတည်ပိုင်ပစ္စည်းစာရင်းတွင် ထည့်သွင်းဖော်ပြ၍ မရနိုင်ပါ ကြောင်းနှင့် တန်ဘိုးလျော့ ခံစားခွင့်လည်း မရှိပါ။

ကုန်သွယ်လုပ်ငန်းခွန်သည် မြန်မာနိုင်ငံအတွင်း၌သာ အကျိုးသက်ရောက်သဖြင့် ထိုင်း နိုင်ငံမှ Internet Bandwith များအား Package အလိုက် ဝယ်ယူခြင်းအတွက် ကုန်သွယ်လုပ်ငန်းခွန် ကျသင့်ခြင်းမရှိကြောင်းနှင့် ပြည်ပမှ Internet Bandwith များအား Package အလိုက် ဝယ်ယူခြင်းသည် နိုင်ငံတော်အတွင်း ဝယ်ယူခြင်း မဟုတ် သဖြင့် Taxation Right မရှိ၍ ပင်ရင်းမှ နုတ်ယူပေးသွင်းခွန် နုတ်ယူပေးသွင်းရခြင်း မရှိပါ။

အင်္ကျီများ၌တံဆိပ်များရိုက်နှိပ်ပေးသည့် ၀န်ဆောင်မှုလုပ်ငန်းသည် ၂၀၁၆ ခုနှစ်ပြည်ထောင်စု၏ အခွန်အကောက်ဥပဒေပုဒ်မ ၁၄ ပုဒ်မခွဲ ( ဃ ) ပါကုန်သွယ်လုပ်ငန်းခွန်မကျသင့်သည့် ဝန်ဆောင်မှု ( ၂၉ ) မျိုးတွင် မပါဝင်ပါသဖြင့်ပုဒ်မခွဲ ( င ) အရ ကုန်သွယ်လုပ်ငန်းခွန် ၅ % ကျသင့်မည် ဖြစ်ပါသည်။